ديوان الشاعر/ لافي حمود الغيداني

يامكثرين الهرج لااسمع ولااجيب "="تريحوا من فضلكم واسمحوا لي
تريحوا لاتلحقون المشاهيب "="على الردى ماني شفوق عجولي
بالعقل والصبر ادب النفس تاديب "="والا لها مده تصول وتجولي
خلج ترازم في سياج المحاديب "="مافيهن اللي بالعقال معقولي
اشد وطية زور من شمخ النيب "="اليا ضاع مفعو ل الحيل والحلولي
انا لاقلت ارتب القول ترتيب"="حتى يجي كي على فك قولي
اليا ارسلت لافكار القريحه مناديب"="ترايعن من عقب ماهن جفولي
لكن مالي من وراها مكاسيب "="لو كان عشاق القشر صفقوا لي
مامستفيد الا العدو والاجانيب "="ولاني مطيع مقرقعين الطبولي
خليتها تعطي فجوج مجاديب "="جربا تجود في رسنها مهبولي
والله لااجنب دام لي درب تجنيب "="من شرهة حشام الرفاقه خجولي
لو انها بين النحر والتلابيب "="من الحيا وجهي مهوب مغسولي
طبع لنا نشب عليه ونشيب "="وطبيعةٍ لعلها ماتزولي
على الجماعه للجماعه مواجيب "="الا جهلوا قدر الرفيق الهتولي
ماني على ربعي قريب محاضيب "="ادناة مايخليني اسرج خيولي
ان جات من طيب شقاها على الطيب "="لو انها اعوج من رقبة الذلولي
وان جات من مسكين منطق واساليب "="حطيتها بين الثرى والنعولي
لاحركت شعره ولاطلعت شيب "="ولاضيقت صدري ولاطق جولي
وان كان في صبري على ميلهم عيب"=" العيب تفتيش الصرر والحثولي
لاقمت تذكر في رفيقك عذاريب "="وتبين عيوبه لذولي وذولي
صبرك على ربعك علاج وتطابيب "="يقصر حبال السالفه لاتطولي
حتى مايلقا في طرفها مقاضيب "="كراه خير وللمشاكل ميولي
واليا بليت بتايه شره وصعيب "="يقول انا العراف وانت الجهولي
قل الله الله ياحصان الاطاليب "="يالفاهم العالم عطيب الفعولي
هذا الكلام اللي مافي صحته ريب "="لانيب لاحولك ولانتاب حولي
حصان وبن حصان طيب مجاذيب "="وبالمعرفه رجل محلي ودولي
خله يروح يخطي الدرب ويصيب "="يقول مابالناس عرضي وطولي
والفرق ماهو باللحى والاشانيب "="الفرق بين الناس فرق العقولي
كم واحد تحسن به الظن ويخيب "="السن يضحك والفواد معلولي
واللي غدت به كلمة مالها غيب "="ماهو من اطيب ربعي اللي غود لي
يالله عساها صيحة في قفا ذيب "="وقلع النيا بيني وبينه يحولي
الرجل مايغصب على الطيب تغصيب "="اليا صار ماهو دل ضمن الدلولي
ومن عادة اللي طيبه يحضر ويغيب "="لاطالت الرفقة زهوق ملولي
واليا بلنك غبر الايام بصحيب "="في مستوى طيبه صعود ونزولي
اعرف ترى الدنيا دروس وتجاريب "="والكامل الله والنقا للرسولي
لاتصير مشذاب يقص العراقيب "="خله وراع الاوله وش يقولي
اخذت حكمه من كلام اللواعيب "="للطيب ناس وللعذارى فحولي



=========================




مايبرد واهج الشوق وشعور الهيام = غير سرداً تطوي البعد بالسرعه طوي
بديها من خلف ماهوب مثله من امام = مستوي في حال .. وبحال ماهو مستوي
خشمها عبرود طلقه .. وموخرها بهام = رافعه راعيه بأشارة ٍ ماتنغوي
لابدو دعاء السفر .. واعلنو ربط الحزام = ورشادات الامن لو ترتطم والا تهوي
واستلمها واحد ٍ خبرته عشرين عام = كبتن ٍ بالله وبكتابه إيمانه قوي
مسلم ٍ عنده خبر بالحلال وبالحرام = جابله ربي على الدين وسلوكه سوي
وصعدت مثل اشقر ٍ فوق جول الصيد حام = لمراوحها مع الجو لجه وحدوي
مثل مايدوي صدى صوت رعاد الغمام = صوتها صداه عبر الفضا يدوي دوي
صنعة اللي ماعرفوا لاصلاة ولاصيام = شعب ٍ أكثرهم ماهو عارف ٍ منهو ذوي
بالنهار لياتعلت كبر فرخ الحمام = دونها الاف المسافات تزويها زوي
وان تغطلس بينك وبين رؤيتها الظلام = كن في روس اجنحتها مشاهيب بدوي
دوبهم دكو عن دلاله الربع الحشام = تحتها من وقدة السمر جمر ٍ مجثوي
دايم وربعه على جلسة ٍ عنده حيام = ابلج ٍ لين جنابه لربعه وحموي
مالي الا هي .. لياجا للاشواق أحتدام = وقامت الذكرى على القلب تكويني كوي
لي شهر وشوي عيني محاربها المنام = ودي احضر جوازي وادورلي خوي
بيني وبينه مسافات وحدود ونظام = واحد ٍ فرقاه شاويتن فوادي شوي
بس ابا ازوره مثل مايزارون الكرام = لين عيني من قباله وشوفه ترتوي
لو بغيت اصبر .. واكابر .. واقول اني تمام = ذيب حبه بين جرد المحاديب يعوي
كان مالي في دروب الهوا شف ومرام = لين شفته .. واشهد انه هواة المهتوي
ياسلام الله على السلهمه والابتسام = وياسلام الله على اللي مابيله مطروي
كن مالله حط في منطقة خصره عظام = وكن غيره ماحتوى مثل ماهو محتوي
لاقعد ماوده يقوم .. ولياقام قام = تلوي اعناق البشر قومته يمه لوي
تقل بين اعلا الجسم واسفل الجسم انقسام = شي من جسمه مرتب وشي ٍ فوضوي
استلمني في جبروته اشر استلام = لين طيّح معنويات راس المعنوي
الغرام ليابطش فيك ملعون الرسام = مايعرف هذا قبيلي .. وهذاك خلوي
يكبر الرجال امام المهمات الجسام = ويصغر الرجال امام الجمال الانثوي
مايتحمل نظرة العين .. وارخاي اللثام = لو باسه باس رحمة حياة بن جلوي


==========================


تنفعني المره على بيت أهل نوف = لو كان مالي عند أهل نوف حاجه
الجادل اللي لافني حبهالوف = لوف الهشيم اللي تلوفه عجاجه
ماارتاح لين اشوفها بالنظر شوف = واخذ على بيت الحبيب إدراجه
اروح قلبي من صخر ماأعرف الخوف = ويبدي عليّ الخوف حين إنتواجه
لا شفتها جاني عن الهرج صادوف = مغير أهز الراس مثل "الخواجه"

==================================

قصيده مهداه للطهيمي

ياراكب اللي لياناظرت تمثاله = تقول صقر ٍ موقع له على قمه
متنطح ٍ للبراد براس منزاله= تشتت الريح شمل الريش وتلمه
فاكسار .. في قيمته زود ٍ على امثاله= لله دره لاشال العزم بمهمه
مايصير له وسق عرق الرمل محباله= عدو عرق النفود وهمه وغمه
صدره ليامن سواقه تساواله= يشرب قراطيع صلف الريح وتزمه
راعيه حرك وهو متريح ٍ باله= متروح ٍ من بني عمه لابن عمه
يسوقه الشوق من رجله الى عقاله= لشوف جمعا رجال ٍ مابهم خمه
من ديرة اهل النقا .. والطيب .. والطاله= والمذهب الزين .. والتوحيد .. والعمه
شيبانها رمز وقت ٍ فات وابطاله = وشبابها للعلا في روسهم همه
على طرفها خزاز يميل اضلاله= قبل يحط الظلام الشمس في كمه
لو مابها غير هاكالضلع وجباله= نحبها كلنا حب الولد لامه
( دخنه ) لعل السحاب يصب هماله= على ارضها لين يطلع كل ماتضمه
منها مشى الجيب لعل السعد فاله= متيمم ٍ يمة ٍ ماغيرها يمه
منصاه رجل ٍ تهرج الناس بافعاله= تبذل يمينه .. وكثر البذل ماهمه
من روس قوم ٍ تهوم الطيب وتناله = ماينكر امجادها رجل معه ذمه
حرب الحرايب كعام اللي يوراله = بنفسه انه مصمصم راس ومطمه
اهل المحازم .. بيوم ٍ تعرف رجاله= ومنصا الوازم .. وسقم العايل وسمه
قلته .. وللمجد بس لربعي لحاله= كل ٍ حباله موردته على الجمه
مابه قبيله ماهي بالطيب مختاله= غصب ٍ على كل متبجح .. ودرعمه
وقصدي .. ومنصاي ابو فواز وعياله= وبيت ٍ بوسطه قبايل حرب ملتمه
يضك بالناس من جاله الى جاله= يطري علي لياشفته وادي الرمه
تنطحك ريحة شذى هيله .. وفنجاله= والعود الازرق منه ينطحك وتشمه
نارد صناياه .. ونصدر على دلاله= ولاهوب جوع وعطش يوم انعنا يمه
كل ٍ غني .. مير يوم انا انتعناله= دافع حمياً تفوح بكل جمجمه
يستاهل المال رجل ٍ هذي اعماله= نفسه بمايزود نفسه طيب مهتمه
يفداه مغلول يمناً لو كثر ماله= عن شنحة الطيب وجهه بارد ٍ دمه
اللي على قول زيد صحيبه رياله= وان طاب طيبه من الزوجه الى العمه
يالله عسى اللي شال اطيب منه يشتاله= يدلي مخاليبه زويان .. ويخمه
رجل ٍ يدنق عن العليا ولا ياله= للطيب .. والدرب قدمه فاتح ٍ فمه
ودك من بعيد وقريب تحماله= بمخمس ٍ من شحمة الاذن للرمه
وعن هالكلام .. وقصير الهرج واطواله= ياكثر بكم الزمان .. وياكثر صمه
يقوله اللي تهمه صحة اقواله = ويسعى يوصل هدف معناه ويتمه
وصلو على المصطفى نبينا وآله = محمد اللي بعث برسالة الامه

============================


كذلك هذه القصيده وهي بعد فوز الطهيمي واعلان النتائج

الحقيقه يابو فواز وبكل افتخار= كل فرحه عارمه للسدود مبوحه
الف مبروك النتيجه وحسن الاختيار= وجايزة وضح ٍ من الغيض جات مشوحه
جات عقب العام تبغى ترد الاعتبار= ماحلا الفاحج على فخذ كل مدوحه
وسم .. وشعار اهل الارماح .. والشلف القصار= والضروب اللي بروس الخصوم مجوحه
مثل مالجيش الامريكي بطش في قندهار= ابطشت بارض المزاين تقل متسوحه
كنها تبا تحب السما كبر ووقار= من ثقتها بزينها بالجميع مطوحه
مثل فاكسارات موكب حدا طوال العمار= يوم جت للعرض امام الامير مروحه
استحقت جايزتها جهار من النهار= وتوجت .. وكبود حساد اهلها مفوحه
واحد ٍ قال انها مغيضه العام استخار= والله ان العام هذا لقبها منوحه

===============================


راكب اللي سرعته تقل شقٍ من سما=ادعجٍ كنه يبا يقول شي ومستحي
جيب لاند كروز وجهه تقل وجه اطخما= من غلا سعره بعيدٍ على بعض اللحي
كن جلده لامشا جلّد همال دهما = سيلها جريه لحا طرف الوادي لحي
وان مشا على هوينه .. تقل مشية عما= يتقدا يوم يمشي على حروة وحي
منوة اللي شابعٍ جوع .. رويانٍ ظما= جائعٍ ظامي على شوف غروٍ منتحي
كل مايزمي خياله على بالي .. زما = هم قلبي .. والمشاريه تنحاني نحي
يامروجت الحكي ماش سن بلا جما= النوايا كنها الشمس والدرب ابرحي
مالعدواني دخل في فراقه .. وانما = عيدوا يوم ان بعده فحا قلبي فحي
مارميتم إذ رميتم لكن الله رما= دارت الدنيا علينا مثل دور الرحي
واوجودي كل مااذكرك ياعذب اللما= وجد من ذنبه محا كل اهل بيته محي

===================================

ياوجود القلب ياشوفته عقب البطا = وجد من عذب ولدها بسجن ( ابو غريب )
حطه الله تحت رحمة سكارا والقطا = الجنود اللي على صدورهم رمز الصليب
لهم حوله قطقطه مثل قطقطت القطا = اللغه ماتنفهم .. والعمل جرم ٍ رهيب
اربعه .. كل ٍ برجله على راسه وطا = وطية الحريب لاطاح بيديه الحريب
واظهرته الصحف عاري على راسه غطا = واعترافاته فضيحه .. وعيب وشق جيب
كان وضعه صح بعيونها واصبح خطا = وقامت تهل العباير .. وتلحقها النحيب
ياوجودي وجدها ماهو بوجد عبطا = اتظاهر بالسلامه وانا جرحي عطيب
صاحبي حبه تغلغل بالاعماق وسطا = سطوة العبرود من كف رماي ٍ يصيب
بس مشكلته خذا كل شي .. ولا عطا = غير جرح ٍ مايداوا .. وذكراً ماتغيب
والله ان غيرك بطاهم معاد اسمه بطا = يالحبيب اللي لاقبلك ولابعدك حبيب

=================================


لعل السحاب اللي من البعـد دوبه واق= عـلى حد الارض من السما تسبر اعـناقه
عـلى ديرة دونه جنوبٍ عـنه ينساق=تقفاه وتلملم شتاته وتستاقه
ذعاذيع ريحٍ ماتشيل وتحـط رواق=يصحـبها شـوية عـنف وانسامها رقاقه
لو تمر بيت البدو مترامي الاشناق= تهزه شوي شوي ماترمي رواقه
تسوق السحاب بدبرة المانع .. الرزاق= إلهٍ عبيده تطلب رضاه وعتاقه
ولامنه تساوى فوق دارٍ غلاها فاق=حدود الغلا .. تستأذن الريح لفراقه
يقر ويسر البال .. والعين .. والخفاق=ويلجّّ رعـده .. ويرفرف البرق بأشـناقه
من بعيد برقه يسهر المسني المشتاق=هكاالليل يقضي كل ليله على ساقه
كاانه يقول ليانتفض برقه الشـعاق= عـلى الهون تكفا ماعـلى قلبي لحاقه
وصـلها وباشـرها على غـيبة الاشفاق= جلال مطره مايعطي الوقت لدقاقه
تضيق بسخاه الاوديه والفضا ماضاق=بغيمه .. وهـتانه .. ورعـده .. وبراقه
يمد الجذع بالوصـل .. والغصـن .. والاوراق=بعد مااشتكى من هجره الغصـن لوراقه
شهر .. ويتجاور فيه راعي غـنم .. ونياق=بربله .. وحوذانه ضـحى تشـبع الناقه
تكحل بنبت فياضه العطره الاحداق= من يشـوف نبته يشكر الله على ارزاقه
شـذا نبت ريضـانه ماينباع بالاسـواق= مايجمع شذاها مع بعض غـير خلاقه
تجلا بتنويع الزهـر قدرة الخلاق=تلاوين نبته تأسر قلوب عـشـاقه
ربيعه .. وغـدرانه .. متى مانهمر دفاق= لدارٍ لها كل الاحاسيس تواقه
سلامي عليها من اولي لاخر الارماق= ولها صادق الاشواق باقه .. ورا باقه
غلاها وسره دافنه في ثرى الاعـماق= وأكيد الغلا ماجا من الباب .. للطاقه

==================================


دام ما بخــلـت بي الدنـيـا البـخـيـلـــه= فــدوة لـلـربـع.. مـن كـمـي لكمي

و دامنـــي فـردِِ مـن أفـراد الـقـبـيـلـه= حرب ربعي..عزوتي..لحمي..ودمي

ما تخيّـر فـي فـصيـلـه عـن فـصـيـلـه= كـل حربـيِّ على الأرض ابن عـمــي


$$$$$$$$$$$$$$$$$$$$$$$$$$$$$




مـن لابـةِ لـفـعـولـهـا تـطـرب الـخـيـل= ويصــعــد بها يم السماء ويتسـامــا

مـجـدِ سنامه عانق الجـدي وسـهـيل=يـوم الحميّا..و الحمــى..والـمـحـامـــا

حـرب ليا جا لـلحرب سبر..ومراسيـل= شـريـدة الـعـدوان رمــْل..ويـتـامــــــا

سـوالـفِ ما هـــي مـجـرد أقـاويـل= ولا هــي كـومـيـديـا فيـلـم..وإلا درامـا

غصبِ على اللي يعرف الحق ويميل= عـن مـجـدنـا مـا هـو عـمى..ويـتـعامــا

ولا أهضم حقوق القبايل ولا أعـيل=يـامـا مـن فـعــول القبـايــل.. ويــامـــا

في كـل دار وكـل ديـره رياجـيـل= ما يـهـضـم الـنـشـمـي حقــوق النشامــا

==================================

قصيدة فيحان الشغار برثاء المرحوم العسيلي
ومجاراة لافي حمود له
لاوالله الا راح من حرب رجال = رجال يحسب بالقبيله فقيده
ماينتعـوض بالعـسيلي بالابدال = الله يغـفرلـه ويرفع رصيـده
اطلب عساه بجنة الخلد نزال = آمين قولوها عساها تفيده
عسى لـه بطوبى منازل ومدهال = حتى تعـوضه بالحياة الزهيده
دنياً عليها كل من حل رحال = فيها البقاء لله محصي عبيده
لكن عزاي انه ورث مجد وافعال = وشعـر ٍ يخلده الحفيد لحفيده
ومواقف ٍ تعرف على مر الاجيال = وغير الوفاء فيه الخصال الحميده
انا منه جاني معاريف ٍ إجزال = بحر المكارم مكرماته فريده
اللي يعرفه زين ياقف لـه إجلال = ويسجم على فقد القصيد وعميده
فقدان رجل ٍ لـه مواريث وأعمال = من روس قوم ٍ بالمواقف عنيده
إلهم عزاي .. وخاتمة كل الاقوال = الله يغـفر لـه ويرفع رصيده

فيحان الشغار

*********************

المجاراه

لاهنت يامتوج صدر جزل الامثال = بأصدق مشاعر تحتويها قصيده
ماهو طرب / غنيت من ضيقة البال = يدفعك دين .. وطيب راس .. وعقيده
وقفة وفاء في كل حال من الاحوال = عليك يافيحان ماهي جديده
ياراس مال مدورة روس الاموال = لك مثلها وقفات .. ماهي وحيده
عزيت حرب .. بطيب الجد .. والخال = اللي من الدنيا طوى الموت قيده
ووجزت في حكمة عقل .. يابن الابطال = عن وصف ميزات الفقيد العديده
باللي علينا حقها فال .. وعقال = وروعة عمل جوهر جسدها تجيده
خلتني اجاريك .. واجر موال = من ضيقة ٍ حروة فرجها بعيده
عقب اليقين اللي قطع كل الامال = واللحظه اللي عاقبتها شديده
شيبان .. صاروا وقتها مثل الاطفال = كل ٍ يغص بعبرته في وريده
هذا الغياب اللي لامنه حصل .. طال = ويذوب منه القلب لوهو حديده
أرفع كفوفي معك لله وأسال = اللي يدبر مايشاه ويريده
يجعل لحد قبره بساتين .. وظلال = ويحييه بالجنه حياة ٍ سعيده

=============================


وين انت ياللي كل ماتمر ذكراك=توقد فتيل الشوق وتذوب الاضلاع
تعال..وجلس صبلي من شفايك= هيل الكلام اللي تصبه بالاسماع
مدري متى اشبع من سوالفك..وارواك=اثر الحكي بعضه خزامى ونعناع
عن كل من حولي تاخذني لدنياك=واندم على وقتٍ قبل لاعرفك ضاع
تزهر حياتي في حضورك ولاماك=مثل المطر..تزهر من حضوره القاع
قلت ابي اجرب قلبي احاول.. انساك=ورتعت قبل القلب يدري ويرتاع
ساق الهوا مركب غرامي لمرساك=ماعاد ينفع به مجاديف وشراع
عطني حضورك..وإقطع دروب فرقاك=لايهب للفرقا على القلب ذعذاع
مايستحق يعيش به كود شرواك=قلبٍ يضمك حب ويضمك اوجاع

===============================


الظّلْمْ كيف اقْبله.. والصّبْر كيف احْرزهْ=عزالله انّي من الاثنين.. قلبي جريح
والله ..مايجرح الرّجّاااال و(يْنفرزهْ)=الأ..لاقال الصّحيييح..وقيل ماهو صحيح
كلمه بسيطه..ولكن حجْم مااااتفرزه=يْخلّي الكون فيك يضيييييق لوهو فسيح
الرّجْل قبل تْحكمْ عليه فجْأه..رزه= يبين لكْ راااهيٍ بالعقل والأ شحيح
والطّيب..واااجد مجال الطّيب مير ابرزه=اظهاااار فعل الجميل..وترك فعل القبيح
حطّ اصبع الطّيييب بعيون الرّدى.. واغْرزه=وش قيمتك بالحياااااه ان ماكسبت المديح
حاولت اجمّع بها فُلّ الشّعر.. وكْرزه=قصيدتي..وارضي الطّيب واغيض البجيح
من عآدتي أجتهد بالقاف..وآطرّزه=باجمل عبارات.. والاّ آريّحهْ واستريح
ان مانظمْتهْ نظُمْ سبْحهْ خْرزهْ..أخْرزهْ=لو قالو انّه مليح..آقول مااااهو مليح

================================


لعيون ساره كتبت احلى المواويل=وغنيتها فدوة(ن)لعيون ساره
عيونها كنها مهدودة الحيل=مايناسب لوصفها الا هالعباره
نعسانة(ن)دوبها ماهوب بالحيل=تسرق من النوم لكن في شطاره
اي والله اني حسدت الكحل والميل=لمصافح اهدابها تاره..وتاره
تبعث من عيونها لقلبي مراسيل=لين انها احتلت القلب بجداره
غدى لها قلبي اوطان ومداهيل=الحالها مالها ضره..وجاره
الله عطاها الجمال بدون تجميل= من كل زين الله اعطاها اخياره
نهارها اجمل نهار وليلها ليل=لياتفرق سواده عن نهاره
ماتحصي اوصافها كثر الاقاويل=لكن قل الحر تكفيه الاشاره
في داخلي للغلا حفل وقناديل= وناس(ن)تعانق بعضها في حراره
ألذ مابالهوى عناد المواصيل= والركض بين الحلاوه..والمراره
كل التعب..لو منه ماجا محاصيل=لخاطر عيونها ماهو خساره

[b]هنا قصيدة للشاعر / لافي حمود الغيداني في حفل تكريم الشاعر/ لهاب الوسيدي :