ديوان الشاعر/ مرير الحبيل

مجموعة من قصائد الشاعر/ مرير الحبيل




يابنت قلبك يفعل العيب ما حس
وان ما هداه الله عسى الله يخسه
يكفي غزل للناس ياخاينه بس
خلي حلالك قفر لأحد يعسه
أبليس لك يابنت في الشر وسوس
تعوذي بالله لعله يخسه
الستر له ثوب من العز يلبس
وجسم الشرف ما كل رجل يجسه
عار ونار مذهب البنت يلمس
وعرض المره ادناة شيء يهسه
يابنت عرضك بالمجالس يدنس
حدر النصايب جعل ربعك تدسه
ولا جايك الا مثل ما قيل واخس
واللي شرفها غالي ما نمسه
ياورع ياللي عندها بان لك حس
قلبك على امك يوم خانتك نسه
امك تغازل من ورى ابوك بالدس
والله من رجل تلذذ بحسه
قله تراخي الحبل يحتاج له مس
وعلم لأبوك الحبل لازم يمسه
ولا يشيل العارلاعاد يجلس
في وسط بيت عاش ما فيه هسه
قله يجوز عن النجس لا يتنجس
ثم يقلعه يالين يقلع مرسه
ولا تلحقونه من حسايف ليا طس
عسى العمى في نون عينه يطسه


====================



نشدني صديق ٍ قال : حبـك ورا مـا بـان
ورا في الغزل ما لـك بيـوت ٍ مسويهـا
ولا لك غـزل يالقـرم بسـم الله الرحمـن
ورا كـن مـا تذكـر هنـوف مهاويـهـا
وأنا أقول قلب ٍ ما يحب الهـوى غلطـان
وأبشـرك والله مـن هنـوف مصافيـهـا
وأبعلمـك وأنتَـه تعـوذ مـن الشيـطـان
دام النشـامـى تستمـعـنـي بآذنـيـهـا
أنا أحب لـي حـب ٍ تولـع بـه العربـان
عيـال النشامـى اللـي طـوال يمانيـهـا
أحب الرجولـة والرجولـة لهـا سيسـان
ترا ساسهـا لا طـاب يرسـي ويرسيهـا
وأحب الكرم وأهل الكرم والكريـم معـان
كريـم ٍ ونفسـه للمواجيـب مصخيـهـا
وأحب اشتري لي عود ٍ أزرق من الدكـان
وأطيب رجـال ٍ سيـرت لـي وأقهويهـا
وأحب الدلال الصفر من صنعة الرسـلان
إليـا دارت المجلـس وماجوبهـا فيـهـا
وأحب الحرار اللي لها في العشـا برهـان
تقضض علـى جـول الحبـاري وتدميهـا
وأحب الحصان اللي سبق والحصان حصان
وأحـب الذلـول اللـي تقـدم براعيـهـا
حسينة حلا يا ما لها فـي الحـلا الاثمـان
خطاة الأصيل إليا أفرحـت وجـه قانيهـا
وأحب الجيوش إليا رزمت داخل الميـدان
إليـا قادهـا القايـد وهــرول يباريـهـا
وأحب الصحاري خص لا شبعت الحيران
لا بكـر الوسمـي وزانــت مراعيـهـا
وأحب الحلال إليا انتشر داخـل الصمـان
قطاعـيـن ذود والـمـواتـر بتالـيـهـا
وأحب البيوت اللـي تظلـل بهـا البـدوان
عيـال الجزيـرة ساكنـيـن بأراضيـهـا
وأحب الخيال المدلهـم لا انهمـر والـدان
وأحب الفيـاض اللـي تناسـف علاويهـا
وأحب انمزع رجلي وأشرف على الجيـان
وأمد النظر في اللي عسى المـزن يسقيهـا
وأحب الجيوب اللي تمرهد مـع الخليـان
تعانـق طيـور الجـو تمشـي مماشيهـا
وأحب الرفيق اللـي وقـت الشدايـد بـان
رفيـق الرفيـق ورفقتـه مــا يخليـهـا
وأحب الخوي اللي تجـي كلمتـه ميـزان
وزن كلمتـه لأجـل الرياجيـل تغليـهـا
وأحب القصيد اللي حكّـم علـى القيفـان
وأحب الصفوف إليا استوت قـدم واليهـا
وأحب السوالـف وأتسمـع مـن الشيبـان
إليـا وردوهـا بيضـت وجـه راويـهـا
وأحب المثايـل لا ضربهـا مثـل راكـان
وأحـب العلـوم الطيبـة وأفتخـر فيهـا
وأحب القصير اللي يبيـن لـك السفطـان
مثـل جيـرة ٍ كـل المخاليـق تطريـهـا
وهي قصرة محمد إليـا عـدّت الجيـران
لـه قصـرة ٍ مـا جالهـا اللـي يحاليهـا
حياة المهادي مـع مفـرج جبـل زومـان
زحول الرجال اللي بقـى ذكـر ماضيهـا
وأحب الهنوف اللي لها في الحشا مسكـان
فتـاة ٍ علـى السنـة عـزاز ٍ مواطيـهـا
ستيرة ولا تحرص علـى فتحـت البيبـان
ولا تلتفـت للـي يبـي يلتـفـت فيـهـا
وخيـر المنـاوي كلهـا طاعـة الرحمـن
لا وهنـي الـلـي صـلاتـه مصليـهـا


=================


قصيدة الجيب



يا ولي الكون يـا جـزل العطيّـه
طالبينك فزعتك فـي كـل شـدّه
انصر أهل الدين واصلح كـل نيّـه
ومن جهل فالديـن للإسـلام ردّه
واجعل الدنيا على المسلـم رخيّـه
وكل بابٍ مـا يفيـد الدّيـن لـدّه
انتـه المنّـان خـلاّق البـريّـه
وانته اللّي من جهل دينـك تـردّه
وانته الراعي وحنّـا لـك رعيّـه
وانته اللّي تقصـر الأجـل وتمـدّه
ما تهيأ يـا ولـي الكـون هيّـه
يا عظيم كاشـفٍ عبـدك وسـدّه
يا بنات الفكـر دقـن لـي تحيّـه
ان بغيتن غصب وان جيتن مـودّه
مثلما تضـرب تحيّـه عسكريّـه
حضّرن عنـدي علـومٍ مستجـدّه
وصفن المعنى مثل صف السريّـه
وكل واحـد خلـن الثانـي يشـدّه
صفّن القيفـان صفّـه بالسويّـه
ويتبين كـل قافـن مـن مشـدّه
وعقـب هذيـه وهذيـه وذيّــه
جايبٍ لي حبـلٍ لا شـرّق نمـدّه
رابط لي بداخلـه عشريـن ليّـه
كل ليّه مـن وقـع فيهـا تشـدّه
وكم قافن ما نـرده عـن نويّـه
وكم قافـن نلحقـه حتـى نصـدّه
وراكب اللي ماورد فاللكون زيّـه
جيبٍ أسود مصدره من يـم جـدّه
فاللزوم اطيب خويٍ مـع خويّـه
وللنظر في مدحت الفكس آر لـدّه
التفت للوصف وآخذ لـي شويّـه
طاريٍ لي من وصوف الجيـب ردّه
كن خشمه لا اعترض خشم المطيّه
وشمعته في مقدمه كبـر المخـدّه
وكن زوله راس ملحـاً دوسريـه
تلتفت يوم اوحت الراعـي يـودّه
والقـزازه لونهـا ميهـاف فيّـه
وكن زيقـه يقسـم البيبـان قـدّه
كن خطّه في جنوبه سلـب حيّـه
تقـل حـرٍ يـوم صقـاره يهـدّه
زين مشيه في الخلي الأصرميّـه
من وراء عرق النفود المستمـدّه
مع صلاة العصر والا في ضحويّه
ولا احتسى له راعي المشوار عدّه
كن جلده لا انطلـق جلـد برديّـه
وعقبه الطـاروق للمعنـى نـردّه
وختمها العنبر وعـود الجاونيـه
وريح هيل وريح مسك وريح نـدّه
وكل رجـلٍ مؤمـن يذكـر نبيّـه
وكلكم صلّوا على المرسول عـدّه


====================



البارحه مـن لـذت النـوم قومـت
جاني عقب ممسيت مثـل الخيالـي
غطيت لي ساعـه وفيهـا تحلمـت
حلمت حلمن حافضـن لـه توالـي
حلمت فـي راس الطويلـه تقدمـت
وروبع الطاروق فـي راس عالـي
اقبل علـي الصبـح والنـوم مانـت
ولاذقت حلو النوم من مـا طرالـي
وصبحت مدري بالقلم ويـش ليمـت
وبلحـق القيفـان قـافـن يحـالـي
مابين حلـم وعلـم ياقـاف قسمـت
وبجمـع القيفـان فـأول وتـالـي
وانا على بـدع الطواريـق عزمـت
وسبايب الطـاروق شيـن طرالـي
ولاجاز لي نضم الطواريق درهمـت
درهمـت معهـن وسهرنـي ليالـي
وبرمت لي قافن اليا برمته ابرمـت
وفتلـت فتـل مفتـلات الحبـالـي
وانا ضميري فكثر القـول حكمـت
وحكمت قافن مادخـل بـه هزالـي
تسمعـو فـي كلمتـي لا تكلـمـت
واليـا زهمتـج يالقوافـي تعـالـي
نويت اعلمكم وانـا الذيـب علمـت
وانصح صغار السن وانصح عيالـي
ضربت مثل يالي لياوحيتنـي لمـت
ماهيـب مدحـه يالنشامـا لحالـي
لاجيتلي في مجلسن يرغب الشمـت
ونمايمـن مابيـن قيـلـن وقـالـي
لامـد فنجالـن شربتـه وكـرمـت
وقلت اسمحولي موعدن لي ارجالي
وانا اليا ماجازلـي مجلسـن قمـت
اببدلـه لـو مجلـس الا لحـالـي
وانا على شوف النشاما ليا ابرمـت
نصيت عـودن فالسوالـف هلالـي
ومجالـس العقـال منهـا تعلـمـت
فيهـا فوايـد والسوالـف جزالـي
واليا هرجت بهرجتن مـا توهمـت
ولاشفت قول الشعر جالـه مجالـي
شاركت معهم فالسوالف وساهمـت
ورديت لـي ردن بقـدر السوالـي
وعن السوالف لرتدا حيلهـا شمـت
وكنيت داخل خاطري مـا طرالـي
افهـم وأفهـم وان تكلمـت فهمـت
وهذا الزمن مابيـن حالـن وحالـي
ودون الطلايب عن حلالي تشيمـت
وافتك من العيـات بوصـاف مالـي
ادفع ولو مانـي غشيمـن تغيشمـت
ونعيـت العيـات باخـر حـلالـي
ساموه قدامي وانـا مثلهـم سمـت
وامشي مع الحييـن مشيـن عدالـي
ولاجات من خبلن ضعيفـن تلزمـت
فالصمـت والمـردود يلقـا بدالـي
والله يساعدني على مسكت الصمـت
لاجات عوجا مـن رفيقـن موالـي
لاشـك لا فـات الزعـل ماتندمـت
وهذا الزمن مابيـن حالـن وحالـي
واليا بدت لـي حاجتـن ماترحمـت
الا لولـيـن فالشـدايـد يسـالـي
والطيب احزامك اليامـن تحيزمـت
ولا الردي جرفن قصيـرن هيالـي
ياعبد لا تنـدم ليـا نويـت واقمـت
انته مدبـر مـن عزيـز الجلالـي

كل الشكر والتقدير على
للتواجد في صفحتي والرد على موضوعي
لا حرمني الله الطلة والتواجد
خالص تحياتي وودي
[ندعوك للتسجيل في المنتدى أو التعريف بنفسك لمعاينة هذا الرابط]